Екстравагантно, луксузно, нешто поинакво се случуваше во светот на модата, а тука кај нас во Банско, во хотелот „Цар Самуил“ – EL Bridal ‘24 колекција на ЕЛЕНА ЛУКА беше презентирана пред струмичани.
Новата EL Bridal ‘24 колекција на ЕЛЕНА ЛУКА, блесна во сиот сјај на евент центарот „Цар Самуил“, каде публиката имаше можност да ужива во нови над 70 прекрасни невестински фустани облечени од манекенките на ЕЛЕНА ЛУКА, но и од млади убави струмичанки, кои за прв пат беа како манекенки, токму во модели на овој моден бренд создаден од струмичанката Елена Пандева.
Раскошот што ова bridal show го донесе со себе, е само уште еден доказ за успешноста, квалитетот и гламурот што ЕЛЕНА ЛУКА го носи со себе и за високата мода која ја промовира. Модниот спектакл на кој бевме сведоци раскажа една вонземска бајка преку совршените венчаници на ЕЛЕНА ЛУКА каде што секоја венчаница е своевиден уникат и неповторливо исткајана приказна за љубовта и бесконечната креативност на дамата визонер и предводник на модниот бренд – ЕЛЕНА ЛУКА. Ценетите гости и пријатели на ЕЛЕНА ЛУКА уживаа во перформансот што наши музички ѕвезди го прикажаа, додека моделите на ЕЛЕНА ЛУКА дефилираа нежно и бајковито во прекрасниот амбиент и низ авангардната сценографија на евент центарот на „Цар Самуил“, воодушевувајќи се од сето она што беше прикажано од нашиот најдобар моден бренд како резултат на сета работа и креативна енергија вложена низ годините наназад.
Водители на вечерта беа харизматичните Снеже Велков и Марко Марк, а целиот спектакл беше поддржан и воден од музичката поддршка на префинетиот пијанист Јордан Петрушевски, моќните вокали на баритонот Иван Наумовски и оперската пејачка Ева Живковска, како и искусниот шарм на оперската дива Дешира Ахмети-Крлиу, а додека пак, коктел-забавата на крајот беше збогатена со прекрасниот перформанс на поп-пејачката Ана Петановска придружувана од Стефан Петановски на гитара. Како заокружување на целата магична вечер, можевме да уживаме во спектакуларен повеќеминутен огномет, по што забавата продолжи со истата магија и гламур.
