Дури седум интервенции имаа струмичките пожарникари денеска до попладневните часови

Повторно пожар над селото Бадилен во општина Ново Село, гореше сува трева кај Сачево и кај Просениково, депонија кај Босилово, сува трева и ниска шума кај Ново Село, пожар имаше кај Индустриска зона „Север“, гореше сува трева и викендица, интервенција на сообраќајна незгода на раскрницата кај Василево. Вкупно седум интервенции имаа струмичките пожарникари – спасители во струмичко, и тоа до попладневните часови.

„Загрижувачки факт е што речиси сите пожари се случија во мал временски интервал. Со сите човечки и материјални ресурси се одговори успешно на сите локации. Многу лесно може да се дојде до ситуација ТППЕ Струмица да не може да одговори на сите пожари во исто време, дури и да има двојно поголеми капацитети. Со вакво темпо на предизвикување на пожари безбедноста на граѓаните и материјалните и природни добра е доведена до крајно ризични граници“ – велат од ТППЕ Струмица.

Од таму повторно со апел и молба до сите граѓани да се воздржат од палење оган на отворен простор. Речиси сите пожари се предизвикани од човечки фактор, дали од невнимание или намерно.

Поради неповолните климатски фактори, високи температури и сушен период, да не се пали оган на отворен простор!

Во случај на пожар или друга елементарна непогода, јавете се на бесплатниот телефонски број: 112 или 193.

ФОТО: ТППЕ Струмица