Државата треба да формира некој фонд кој ќе им помага на земјоделците, но и малите и средни претпријатија во процесот на аплицирање за средства од ИПАРД фондовите на ЕУ. Ваква порачаа присутните на едукативната работилница во Радовиш што ја организираше здружението „Медија Инфонет“ од Струмица во рамките на проектот „Поврзи го Југоистокот за Европска иднина“ финансиран од ЕУ преку Евротинк, Алда и Бирц во земјава од проектот „Медиумите за ЕУ“.
На присутните им се обрати градонаачлникот на општина Радовиш, Ацо Ристов кој истакна дека добро е кога граѓанскиот сектор организира едукативни работилници со практични примери околу целата постапка за аплицирање со проекти за развој од ИПАРД програмата. Според него, само со поголема информираност ќе може да се користат овие пари што ги нуди ЕУ како за развој на земјоделството така и за развој на мали и средни претпријатија од агро секторот.
„Иако сум овде како градоначалник на општина Радовиш, сепак тука сум и како лице да научам нешто ново, бидејки ЕУ нуди огромни можности како поддршка која треба ние да ја искористиме. Ние имаме потенцијал, но ни требаат вистински информации за да го искористиме“, кажа градоначалникот Ристов.
Присутните на работилницата во Радовиш кажаа дека имат слушнато за оваа програма. Дел од реалниот сектор користеле за проширување на своите капацитети. Но онаа што беше потенцирано е дека целата постапка околу добивањето на европски пари е комплексна.
„Хрватска има еден вид Фонд за поддршка и интервенции и сметам дека и во земјава мора да постои некое државно тело или Фонд кој ќе ги помага заинтересираните. Тој Фонд освен со поддршка во целата постапка околу административната процедура, проект, аплицирање, да помогне и во обезбедување на средства за релизација на инвестиционите зафати. Голем број физички и правни лица не се доволно упатени во ЕУ Ипард програмата“, кажа Сашко Коцев од Радовиш.
Целата постапка и условите за добивање на европски пари преку ИПАРД програмата ја објасни Тихомир Трпевски. Тој на присутните детално ги објасни процедурите и постапките околу целиот процес, но и кои се евентуалните проблеми на кои ќе наидат апликантите за добивање пари од Европските фондови за земјоделство и рурален развој.
„Вкупно 97 милиони евра неповратни средства се обезбедени од ЕУ преку ИПАРД 3 програмата. Таа е од 2022 година и ќе трае до 2027 година. Државата ќе финансира со 25%. Во претходните два циклуса ИПАРД 1 и ИПАРД 2 имавме на располагање 223 милиони евра. Станува збор за мерка 1 – Инвестиции во основни средства на земјоделски стопанства кои опфаќат механизација, складишта, технологија за преработка и мерка 7 – Диверзификација на фарми и развој на бизниси што опфаќа туризам, преработка, обновливи извори, инфраструктура во рурални подрачја“ – кажа Трпевски.
Проектот „Поврзи го Југоистокот за Европска иднина“ што го имплементира здружението „Медија Инфонет“ има за цел да ја „приближи“ ЕУ до граѓаните во Југоистокот преку ИПАРД фондовите.
Утре едукативна работилница ќе има во Богданци за гевгелиско-валандовскиот микро регион. Проектот е финансиран од ЕУ преку проектот „Медиумите за ЕУ“, што го спроведува Евротинк во соработка со Алда и Бирц.
