Двајца дипломати од Италија и Шпанија во Струмица промовираа книга – „Македонски погледи“

Во Локалната установа Библиотека „Благој Јанков Мучето“ во Струмица беше промовирана четиријазична книга – стихозбирка насловена „Македонски погледи“ на двајца дипломати во Македонија, Марио Де Роза, заминик шеф на мисијата на Италијанската амбасада и Ернесто Ередеро дел Кампо, вицеамбасадор на Кралството Шпанија во Македонија.

Ова книга е дијалог на погледи, јазици и емоции собрани меѓу кориците, а посветени на нашата прекрасна земја Македонија во која читалот ќе пронајде фрагменти од повеќе симболи кои ја отсликуваат нашата земја, крстот на Водно, слаповите вода кај Мокрино, Зрзе, Дојранските трски, Охрид, Струга, Вардар…

Ова дело е плод на средбата на двајцата колеги дипломати, кои се запознале пред една година во Македонија и развија искрено и богато пријателство. Покрај љубовта кон поезијата и кон Македонија, која ги зближи, тие споделуваат и взаемна љубов кон своите земји и јазици. Од овие заеднички афинитети се родил интензивен дијалог во стихови.

Книгата е напишана на четири јазици, македонски, италијански, шпански и англиски јазик, а освен стихови кои опфаќаат теми од љубовта, па до смислата на животот, од просторот па до природата на времето, во книгата можете да прочитате сеопфатен разговор за различните форми на поетскиот јазик и за разликите што постојат меѓу бројните јазици, во нивниот начин на доловување на реалноста и изразување на реалната ширина на човечкото искуство.

Модератор на промоцијата беше Гонца Запрова Анастасова виш библиотекар, промотор на стихозбирката Ѓорги Калајџиев, стиховите на македонски јазик ги читаше Наташа Василевска – Трајчевска виш библиотекар, а на присутните во име на библиотеката им се обрати м-р Аница Глигорова Милева, советник библиотекар. Присутните гости уживаа и во прекрасните звуци на гитара на младата Александра Цветанова.

Ова промоција ја организираше Библиотеката „Благој Јанков Мучето“ во соработка со Здружение за промоција на италијанскиот јазик и култура „Quo Vadis Ad Astra“.

ФОТОГАЛЕРИЈА