![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Домаќинки и домаќини, млади и повозрасни испекоа околу 500 килограми црвена пиперака, направија домашен ајвер и го спакуваа во околу 250 тегли. Ова беше подготвено во само еден ден на првата „Ајверијада“ што се одржа во Босилово. Кој од кој повкусен, топол ајвер, некоја тегла малку лут, друга благ, за сечиј вкус, а го пробаа многу народ со домашно лебче, сиренце.
Прекрасна манифестација што ја организираше Општина Босилово, а освен топлиот ајвер подготвен на лице место, беше изложен за дегустирање и веќе подготвен ајвер, од оваа сезона, имаше и лутеница, малиџано, традиционални домашни вкусни јадења, баница, земички, пенарлија и многу други пекарски производи. Сите си апнаа, а некои и си купија по некоја тегла за дома.
Освен што се јадеше, на „Ајверијадата“ и се пееше, пееја Ленче Кукиќ, Благица Калева, Живко Динев, Бисера Гавровска, а и се играше, играорците на КУД „Гоце Делчев“ од Босилово и КУД „Кирил и Методиј“ од Иловица ја разиграа и публиката.
Градоначалникот на општина Босилово, Ристо Манчев е задоволен од првата организација на „Ајверијадата“, вели дека идејата за оваа манифестација потекнува од тоа што струмичката пиперка, босилската пиперка и ајверот се нашиот најголем бренд, не само на општина Босилово, туку и на целиот струмички регион, па и на Македонија.
„Потребни ни се вакви манифестации за промоција на нашите производи и за развој на руралниот туризам“, додаде градоначалникот Манчев, најавувајќи дека оваа манифестација ќе прерасне во традиција со одржување секоја година во овој период од годината кога традиционално се подготвува ајверот.
ФОТО: Дени Стефановски
