Кандидатот за градоначалник на општина Струмица од редовите на СДСМ, Марјан Даскаловски, вечерва организираше коктел-дружење со поранешни и сегашни членови на партијата кои низ годините биле дел од локалната и државната власт. Настанот, кој се одржа во пријатна и неформална атмосфера, обедини повеќе генерации на социјалдемократи со цел заедничка поддршка и визија за идниот развој на општината.
Меѓу присутните беа поранешниот градоначалник на Струмица и премиер на Македонија, Зоран Заев, долгогодишната пратеничка и поранешен генерален секретар на Собранието, Цветанка Иванова, поранешниот секретар на Општина Струмица и државен секретар во Министерството за локална самоуправа, Кирил Парталов, поранешната министерка за труд и социјална политика, Јована Тренчевска, како и Стојан Динев, долгогодишен раководител на Одделението за урбанизам и Зоран Китанов, поранешен директор на Јавното претпријатие за Државни патишта.
На настанот присуствуваа и поранешни и сегашни членови на Советот на општина Струмица, како и новите кандидати за советници, предводени од д-р Миле Гогов.
Во своето обраќање, Даскаловски ја побара поддршката на присутните за претстојните Локални избори на 19 октомври, како за својата кандидатура, така и за советничката листа на СДСМ. Тој ја претстави својата програма за развој на општината во периодот 2025–2029 година, нагласувајќи дека искуството на поранешните функционери и енергијата на новата генерација се најсилната комбинација за напредок на Струмица.
Пред присутните се обрати и носителот на советничката листа на СДСМ, д-р Миле Гогов, кој ги претстави приоритетите и целите на тимот.
По официјалниот дел следеше коктел-дружење, на кое поранешните и сегашните членови на партијата разменуваа мислења, се потсетија на минатите успеси и дебатираа за идните предизвици и насоки во кои треба да се движи локалната власт во Струмица.
