Дами и Господа! Концерт под маски (13)…

Дами и Господа она што се случуваше синоќа во Струмица по којзнае која пат го докажува епитетот Ѕвезден град, град во кој се раѓаат ѕвездите, од оние најмалите, град во кој живеат најдобрите уметници, град со најдобрите таленти, градот на музиката, на традицијата.

Во Центарот за култура во Струмица синоќа се случуваше „Концерт под маски“… Ако не бевте таму тешко ќе е да се раскаже, чуствата, емоциите, возбудата, визуелната имагинација на сцената со околу 250 деца, младите таленти на музичкото училиште „Боро Џони“.

Инспирацијата на учениците, професионалноста на нивните ментори, на сцената поставија нешто што можете да го почуствувате само кога сте на позната голема сцена во некоја од европските метрополи. Музичка приказна автентична од „нашето време“, актерска интерпретација со инструментални, соло и хорски изведби во живо.

Песни, музика, дијалог, кореографија во ритамот на мелодијата, ликови од цртаните филмови, глувци и мачки, госпоѓа Мачка и господин Глушец, Пинк Пантер, ликови од познати мјузикли, „Мачки“, „Фантомот од операта“, на сцената беше и малиот Виктор Борге… И професорите пееја, македонски шлагери од 70-тите, ги глумеа без маски Славе Димитров, Драган Мијалковски, Никола Автовски, Нина Спирова… го доловија Бродвеј со македонски евергрини… А салата преполна, и на двата концерти, и на тој во 18, и на другиот во 20 часот. Публиката уживаше во глумата и гласовите на младите уметници во приказната што веќе 13-та година ја создава Музичкото училиште „Боро Џони“, а посветена на струмичката публика во пресрет на големиот Струмички карневал.

Концертот под маски не се раскажува, не може ова ноќ да се опише со реченици… Но, фотографиите и видео снимките ќе може барем малку да ви ја доловат прекрасната атмосфера во карневалска Струмица…

ФОТОГАЛЕРИЈА >>>

ВИДЕО на ТВ канал ВИС >>>