![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Познатиот македонски фоклорист Иван Котев од Струмица пред струмичката и македонската јавност ја промовира својата 16-та книга, овој пат, вториот том со народни поговорки од струмичко – „Судбина с’с ваглен напишана“. Професорката д-р Ана Витанова Рингачева, рецензент на книгата, вели дека оваа е продолжение на првата голема книга на Котев издадена пред 12 години – „Мудроста на вековите“, која и до ден денешен го има интересот на научната јавност.
„Вториот том Иван Котев посака да го нарече „Судбина с’с ваглен напишана“. Станува збор за една убава мудрост, израз запишан токму од народниот мудрец, книга која содржи околу 14.000 фолклористички единици, поговорки, пословици, фрази, изрази… Всушност оваа книга претставува уште една грамада од богатство, кога говориме за кратките фолклорни жанрови, односно поговорките, пословиците на коишто Иван последните години навистина многу сериозно работи и е посветен, книга која само на нему својствен начин, многу штедро, многу внимателно ги запишал, ги дешифрирал, ги подредил онака како што тој сметаше дека треба“ – кажа професорката Ана Витанова Рингачева.
86-годишниот Иван Котев очекува оваа книга со 500 страници да си ја изигра својата функција како еден документ за едно време, за еден народ, за еден јазик којшто, како што вели тој, цвета во поговорките.
„Фолклорот е поле со бескрајни можности за работа на сите полиња. Од фолклорот, од поговорките може да научиме како живеел народот порано, какво било правосудството, како била социјалната положба на жената, на децата. Поговорките се еден вид патоказ и показател на општите струења во животот на една средина, на еден народ, на една држава, на една нација“ – кажа Иван Котев.
Котев вели дека поговорките ги употребуваме во секојдневниот живот, дури не сме свесни за тоа, поговорката е составен дел на нашиот јазик, на зборот.
„Треба да внимаваме на зборот пред да го изговориме, оти кажа ли го зборот, не се враќа назад. „Зборот излева низ два заба, ама оде низ два града“, и после ти докажи дека не си рекол или си рекол, потенцира Котев.
„Поговорките се еден благослов на еден народ. Народ кој створил толкав голем број поговорки, гатанки, зборови, кој создал една усна уметност, народ кој умеел да се носи со времето, да преживее векови во ропство, не е обичен народ, тој е еден жилав народ, како што е македонскиот, и ние можеме да бидеме горди што сме припадници на тој народ затоа што неговиот јазик е свет јазик, на него можат да се изразат најсуптилните, најнежните чувства. На него можат да се кажат најборбените повици, да се искаже најтешката мака на народот. Со еден збор кажано, нашиот народ создал една голема света уметност. Не сме случајно спомнати во библијата повеќе пати. Ништо не е случајно, тоа да ви е јасно“ – кажа во своето обраќање нашиот фолклорист и собирач на народни умотворби, Иван Котев.
На промоцијата на книгата „Судбина с’с ваглен напишана“, која се одржа синоќа во Центарот за култура „Антон Панов“ во Струмица, неформално обраќање имаше и пензионираниот професор-филолог, Јордан Стојановски.
Кратките фолклорни форми, пословици, поговорки, фрази, изрази, на промоцијата на книгата ги интерпретираа професорите по македонски јазик, Сузана Мицева и Ице Беличев на задоволство на публиката која уживаше во хумористичниот гениј на нашиот народ кој создал огромен број кратки форми.
Неуморниот собирач Иван Котев го најави и третиот том со народни поговорки од струмичко, веќе се напишани 15 страници, а најави и промоција на 24 мај 2025 година на нова книга, втор дел од книгата за едно од првите македонски училишта кое било во селото Робово, струмичко – „Од преродбата до денес“. Овој пат акцент става на оние кои работеле во училиштето, или се од Робово, а работеле во други училишта. Тој најави и уште една книга „Бројалки, залагалки“, детски фолклор која ќе ја надополни и со народни детски игри од времето наназад.
