Денеска во Владата, градоначалниците на општините Струмица, Василево, Босилово и Ново Село, Костадин Костадинов, Славе Андонов, Ристо Манчев и Ѓорге Божинов потпишаа договори со министри од Владата за реализација на проекти во нивните општини како дел од вториот повик од инструментот за капитални инвестиции.
Општина Струмица ќе добие околу 6,5 милион евра за реализација на повеќе проекти, меѓу кои и доуредување на поројот „Крушевска Република“ во градот Струмица, целосно инфраструктура околу новиот градски пазар кој почна да се гради позади „Разнопромет АС“, станбени и сервисни улици во Струмица…
„Ова не се само проекти – ова се конкретни чекори за ново урбано лице на нашиот град. За повисок квалитет на живот, за поубава, поподготвена, похумана и поевропска Струмица. Од срце му благодарам на мојот тим за посветената работа, но и на Владата и Премиерот, кои ја препознаа нашата визија и го валоризираа трудот што го вложивме“ – стои во Фејсбук објавата на градоначалникот Костадин Костадинов.
Во општина Василево ќе се реализираат проектите: Изградба на отворен канал во Дукатино, Изградба на фекална канализација во Радичево, Реконструкција и ревитализација на улица од влез до центар на Пиперево, Реконструкција на улица во Нова Маала кон гробишта и Изградба на последен крак од фекална канализација во Пиперево.
„Упатувам огромна благодарност до Владата и до Премиерот Христијан Мицкоски за големата финансиска поддршка што за првпат на ваков транспарентен начин централната власт им ја дава на единиците на локалната самоуправа. Ова претставува поттик за нас да работиме уште поактивно во интерес на граѓаните на Василево и со нивна взаемна соработка да креираме подобро утре за нашата општина“ – стои во објавата на Фејсбук страницата на градоначалникот Славе Андонов.
Во општината Босилово, според информацијата од градоначалникот Ристо Манчев со овој втор повик од инструментот за капитални инвестиции ќе се реализираат вкупно 18 проекти, меѓу кои се изградба на локален пат Радово – Турново, Канализација во Моноспитово (2 фаза), како и повеќе улици во населените места Босилово, Дрвош, Петралинци, Гечерлија, Сарај, Робово, Еднокуќево, Секирник, Моноспитово…
Во општина Ново Село ќе се реализираат десет проекти, меѓу кои се: Изградба на нов водовод во Самиолово, Изградба на нова спортска сала во Колешино, Поставување на метална платформа на Смоларски водопад, Изградба на пешачка и рекреативна патека од Ново Село до Мокриево – фаза 2, Реставрација и конзервација на фрески во Црквата „Св. Константин и Елена“ во Мокрино и изградба на улици во Ново Село, Мокрино и во индустриските зони Кошутица, Смолари и Мокриево.
„Од план до реализација. Од хартија до градилишта. Нема чекање, нема изговори. Ова е домаќинско управување со парите на граѓаните. Пари што порано завршуваа во нечии џебови, денес се гледаат во објекти, улици, училишта, водоводи. Од застој и партизација до резултати и реални градилишта. На дело ја покажуваме разликата, од политички спинови до бројки и багери. Македонија не е само Скопје, инвестираме подеднакво во секое село и секој град. Ова не се партиски ветувања, ова се 828 конкретни договори. Не зборуваме само за иднината, туку истата ја градиме секој ден. Нема да дозволиме ниту еден регион да остане запоставен. Нема да има граѓани од прв и втор ред. Секоја општина е важна. Секој човек е важен. Ова што денес го правиме, е градење на темелите на промените. Со секој потпишан договор, со секој започнат проект, ја менуваме иднината на Македонија. Во име на народот, и за народот. Доаѓа времето на Македонија“ – кажа во своето обраќање премиерот Христијан Мицкоски по потпишувањето на договорите за реализација на проектите со сите градоначалници од општините во Македонија.
