Градоначалникот на општина Струмица, Костадин Костадинов пред малку на својата Фејсбук страница реагираше за квалитетот на водата за која од „Комуналец“ предупредија граѓаните да не ја користат за пиење.
Објавата на градоначалникот во целост ви ја пренесуваме:
Директорите на АД Водостопанство – Подрачна единица Струмица, а веројатно и директорот генерален на АД Водостопанство на централно ниво решиле да не освестуваат мене и директорот на ЈПКД „Комуналец“ Струмица, тотално неосвестени за испораката на техничка вода од нивна страна до толку загадена што не сме во можност преку Филтер станицата да ја прочистиме до степен на питка вода!
На пример толку е голема негрижата од страна на АД Водостопанство за нивоата на водата на браните што пред некој ден на решетката на Филтер станицата пронајдовме риби, за кои се надеваме нема да ни биде испорачана фактура.
Замислете бараат финансии и се закануваат дека ќе не исклучат сите нас струмичани од снабдување со техничка вода.
Искрено очекував дека ако не друго барем ќе се погрижите за квалитетот на вода со кој не снабдувате, за да не бидеме приморани да ги известуваме граѓаните дека водата е со поголемо количество на Манган и е непрепорачлива за пиење!
Почитувани директори од АД Водостопанство, низ годините наназад ние се трудиме и сакаме да соработуваме, за жал немате капацитет како институција да ни испорачувате услуги за кои граѓаните плаќаат и директно и индиректно.
Преку 40 години немате исчистени речни корита кои за тие вон урбан опфат имате директна и непосредна надлежност, заради кои повторно ги доведувате граѓаните во опасност од поплави, па ние сме приморани со општински средства да целото тоа го регулираме.
Ова вака не може, да наплаќате за нешто кое што никогаш не сте го испорачале, доколку не ви е јасно прашајте колку пати општината, „Комуналец“ сме одобрувале средства за нафта, механизација, за да решиме одреден проблем, за кој вие сте НАДЛЕЖНИ.
Ваквите драмолетки почитувани функционери воопшто не се потребни, а кога веќе говорите за намалување на вработеноста и сакате да ни решавате наши проблеми, погледнете си го вашиот двор.
Изненаден сум од желбата и ревноста на АД Водостопанство да по секоја цена на пик е ставена Струмица, но пред се граѓаните на Струмица.
Со еден збор, СРАМОТА!!!
Ние сме издржливи и мудри, Струмица и струмичани издржале многу, ќе ве издржиме и вас, на крај нормално ќе победиме.
А со вас, вратата секогаш ќе биде отворена за соработка, но во рационални, разумни и логични рамки.
До тогаш, променете се, инвестирајте и почнете еднаш засекогаш да испорачувате услуги пред да испорачувате фактури.
Прочитајте го УСТАВОТ на Македонија пред јавно да се заканувате, оти ако добро ве разбрав, слабо го познавате.
Од мене ви е простено, дел од работите ќе ги решаваме веројатно на суд, граѓаните сами нека си одлучат!
