![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Во просториите на НУ Завод и Музеј Струмица од синоќа е поставена изложбата „Ченто – биографија низ фотографија“ од авторот Рубинчо Белчески, историчар – кустос советник во НУ Завод за заштита на спомениците на културата и Музеј – Прилеп.
Станува збор за првиот претседател на Народна Република Македонија во рамките на СФРЈ и претседател на Президиумот на Првото заседание на АСНОМ, борец, деец и поборник за самостојност на Македонија, Методија Андонов – Ченто.
„Со започнувањето на процесот за независност и осамостојувањето на Република Македонија сѐ почесто се зборуваше за името на големиот Македонец, борец, деец и политичар, Методија Андонов Ченто, првиот претседател на Президиумот на АСНОМ. Од тој период до денес, повеќе историчари, публицисти и други личности, вклучувајќи го и синот на Ченто, Илија, напишаа повеќе публикации, а беа издадени и зборници за животот и делото на човекот – визионер, кој уште во минатото знаеше дека Македонија еден ден ќе стане независна и самостојна држава. Во чест на Ченто, подигнати се повеќе меморијални споменици, спомен обележја, а воедно создадени се повеќе уметнички и други дела. Желбата ми беше и јас да дадам свој придонес во расветлувањето, а пред сѐ во презентирањето на ликот и делото на Ченто, создавајќи едно дело, но со поинаква форма и содржина од досегашните напишани дела за него. Така ја започнав својата „собирачка“ дејност“ – кажа авторот на изложбата, прилепчанецот Рубинчо Белчески.
Изложбата „Ченто – биографија низ фотографија“ вклучува 250 хронолошки подредени фотографии каде е застапен ликот на Ченто, членови на неговото семејство, негови соработници и има за цел да го следи неговиот бурен живот исполнет со голем број активности, но и фотографии кои „зборуваат” за „неговиот живот и после смртта“. Изложбата е овековечена и преку фотомонографијата со истоимен наслов збогатена со хронологија на настани и голем број активности на Ченто.
Изложбата за Ченто досега била поставена во 21 град во Македонија, а планирана е во уште десеттина градови. Во струмичкиот Музеј ќе биде отворена во наредните 10 дена каде граѓаните ќе можат да ја видат од понеделник до петок во периодот од 09:00 до 15:00 часот.
