Во струмичката болница за првпат е направена лапароскопска ресекција на дебело црево

Денеска во ЈЗУ „Општа болница“ Струмица за првпат беше направена лапароскопска ресекција на дебело црево од страна на д-р Тони Балџиев, абдоминален хирург. Станува збор за лапароскопска десна хемиколектомија, отстранета десната половина на дебело црево кај пациентка на 48-годишна возраст, информираат од струмичката болница.

Лапароскопијата е современ метод за дијагностика и лекување, миниинвазивна хирушка интервенција преку која се визуелизираат органите во абдоминалната празнина. Предностите во однос на отворената (класична) абдоминална операција се: помала хирушка траума и крвозагуба, помал цикатрикс (белег), помала болка кај пациентите, побрзо постоперативно закрепнување и помала стапка на инфекција на раната.

Од ЈЗУ „Општа болница“ Струмица велат дека тимот на абдоминални и општи хирурзи работи лапароскопски хирушки интервенции – лапароскопска холецистектомија и апендектомија. Последните две години тимот на абдоминални хирурзи од струмичката болница работи хирушки третмани – операции на пациенти со малигни заболувања (карциноми) на дигестивниот тракт, кои претходно беа препраќани на Клиника во Скопје.