Во Центарот за култура „Антон Панов“ во Струмица од синоќа е поставена Меѓународната изложба „Пријателство“, која веќе 9-та година ја организира оваа установа во соработка со Здружението „МОСТ“, а со поддршка на Министерството за култура и туризам.
На изложбата се претставени 20-тина дела на познати македонски и бугарски автори, но и на автори од Шпанија, Србија и Црна Гора: Александар Филев, Стефан Хаџи-Николов, Петар Чучулигов, Решат Амети, Полина Тодорова Станчева, Јелена Вушуровиќ, Десислава Денева – Деде, Ортега, Здравко Вучиниќ, Стилијан, Новица Трајковски, Милан Благоев, Тома Трифоновски, Христо Георгиев, Меџити Бешким, Миодраг Елезовиќ, Јерослав Вешин, Диана Захариева и Евгениј Кузманов.
Во изминатите 9 години на оваа традиционална изложба се претставени дела од вкупно 120 автори.
Изложбата ја отвори директорот на Центарот за култура „Антон Панов“, Драган Маџиров, а Митко Георгиев од Здружението „МОСТ“ се заблагодари на сите досегашни учесници и на поддршката на Министерството за култура и туризам кое уште од почетоците ја препозна оваа соработката меѓу македонски и бугарски автори и претставувањето на нивни дела секоја година во Струмица, а на која последните години се изложуваат и дела на ликовни уметници од други европски држави.
Отворањето на изложбата беше збогатена и со музички изведби на клавир од млади талентирани ученици под ментрство на нивните професори.
Меѓународна изложба „Пријателство“ во Центарот за култура „Антон Панов“ во Струмица ќе биде поставена во наредните десет дена.
