Во Струмица одбележана 130-годишнината од основањето на Македонска Револуционерна Организација

Македонија денеска го чествува 23 Октомври – Денот на македонската револуционерна борба и 130 години од основањето на Македонска Револуционерна Организација во Солун во 1893 година, како симбол на стремежите за сувереност и државност, но и храброста и истрајноста на македонските револуционери во борбата за слобода, сувереност, независност и македонска државност.

Денеска во Домот на АРМ во Струмица се одржа свеченост на која за историографијата на празникот говореше претседателот на Општинскиот комитет на ВМРО-ДПМНЕ во Струмица, Жан Дрвошанов.

„Во секое вистинско македонско срце живее идеја, мисла и завет дека додека има ВМРО ќе има слободна Македонија. Додека има ВМРО постои гаранција на вечната кауза Македонија обединета и независна“ – кажа во своето обраќање Дрвошанов.

Дрвошанов говореше и за името ВМРО, дека некој погрешно мисли дека секој може лесно да го присвојува светото име на ВМРО.

„Да се биде ВМРО значи да се има таква љубов за Македонија што да може да се поднесат прогони и понижувања, да се има политички гробови во секој век и насекаде, да се има политички затвореници дури и во денешно време. Но да се биде ВМРО значи да се осуди и казни секое национално предавство. Сите што се бориме за Македонија знаеме дека да се биде ВМРО е навистина макотрпно и бара сериозни укажувања. Истовремено бара и да се има силна верба, надеж, љубов и конечно, заедно со мудроста тоа се единствени вредности што може да им ги оставиме на потомците под ова наше македонско небо“ – кажа во својот говор Жан Дрвошанов.

На свеченоста што ја организираше Општина Струмица со свој рецитал се претставија членови на Домот за деца и млади „Благој Мучето“ од Струмица, а настап со традиционални македонски ора имаа играорците на Ансамблот „Фолклорна низа“.

ФОТОГАЛЕРИЈА

• Македонија денеска празнува – 130 години од основањето на Македонска Револуционерна Организација во Солун