Во недела, на 26 јануари во Домот на АРМ во Струмица, со почеток во 19:00 часот, ќе се одржи Концерт на американскиот бенд „Never Come Down“, финансиран од Амбасадата на САД во Република Северна Македонија.
Концертот се организира по повод почетокот на имплементацијата на Access проектот во Струмица и е наменет за публика која ќе се состои од над стотина средношколци и наставници од Велес, Пробиштип, Радовиш и Струмица, вклучени во програмата. На настанот ќе присуствуваат и дипломати од Канцеларијата за односи со јавност при Амбасадата на САД во Македонија.
Access проектот (English Access Microscholarship Program) е глобална двегодишна стипендиска програма поддржана од Стејт Департментот на САД, чија цел е преку интерактивни активности да обезбеди можности за учење и развивање на англискиот јазик за средношколците. Од своето основање во 2004 година, повеќе од 150.000 ученици во над 85 земји биле дел од програмата.
Во Македонија Access проектот се спроведува од страна на Македонскиот центар за граѓанско образование (МЦГО Скопје) со успешно учество на над 500 средношколци од 11 градови.
Програмата Access не само што ги подобрува јазичните и комуникациските вештини на учениците, туку и им овозможува да се запознаат со културата на САД, демократските вредности и да развијат лични и професионални вештини. Преку дополнителни активности, тие се вклучуваат во општествено корисни иницијативи, со цел подобра подготвеност за работните предизвици, пристап до идни можности за вработување и учество во разменски програми и образование во САД.
Во Струмица, Access проектот ќе ги опфати трите средни училишта и ќе се реализира во просториите на Гимназијата „Јане Сандански“. Проектот е поддржан и од Општина Струмица, која за оваа пригода го отстапи просторот при Домот на АРМ за одржување на концертот, кој е бесплатен за посетителите.
