![almak](https://strumicanet.com/wp-content/uploads/2025/07/1080x206-srnet-optimized.png")
На Фејсбук страницата на градоначалникот на Струмица, Костадин Костадинов е објавено дека денеска општинскиот инспектор за животна средина на Општина Струмица направил шест вонредни инспекциски надзори и констатирани се неправилности кај сите шест правни субјекти.
Според објавата, две фирми ќе добијат прекршочен платен налог со казна во висина од 9.000 евра, а управителот ќе биде казнет со 500 евра. За три фирми ќе се донесе Решение за изработка на елаборат за животна средина и да се преземат соодветни технички мерки за вградување филтер со кој ќе се намали, спречи и контролира негативното влијание врз квалитетот на воздухот, а за еден правен субјект ќе се донесе Решение согласно дејноста која ја обавува да се изработи елаборат за животна средина согласно член 24 од Законот за животна средина.
Во објавата е наведено дека двете фирми ќе бидат казнети согласно член 37, став 4 од Законот за управување со отпад во кој се вели дека „Се забранува горење или согорување отпад на локации кои не се наменети за таа цел, како и користење уреди и инсталации за кои не е издадена соодветна дозвола согласно закон или во кои горењето или согорувањето на отпадот може да ги загрози животната средина, животот и здравјето на луѓето“.
Инспекциските контроли денеска биле направени кај четири фирми за производство на мебел, една за производство на амбалажа од пластични маси за пакување и една за изработка на метални конструкции. Засега официјално соопштение од општинскиот инспектор до медиумите за извршената контрола во шесте фирми нема.
