Во општина Струмица 451 прваче зачекорија во основното образование – 417 нови средношколци во двете средни училишта

Денеска е најубавиот, највеселиот и најголемиот ден за секое училиште. Највесели, но и со некоја солза беа првачињата кои за прв пат стапнуваат на најубавата и највозбудлива патека во животот – патеката на образованието.

451 прваче во деветте основни училишта на територијата на општина Струмица за прв пат зачекорија во своите училници и седнаа на училишните столчиња. Годинава бројката на нови првачиња е скромно поголема од минатата учебна година кога на 1 септември го стартуваа образованието 442 првачиња.

По повод почетокот на образованието на првачињата, денеска Општина Струмица организираше мала свеченост во Центарот за култура „Антон Панов“ каде им се обрати и им го честита првиот училишен ден градоначалникот на општина Струмица, Костадин Костадинов.

„Денеска за прв пат влегувате во вашите училишта и го започнувате основното образование. Ви посакувам многу успех во учењето, здравје и среќа. Нека е со среќа новата учебна година“ – им кажа Костадинов.

Во чест на првиот училишен ден актерите од струмичкиот театар за првачињата ја изведоа детската претстава „Царевата нова облека“.

Во деветте основни училишта во општина Струмица вкупно 4921 ученик ќе следат настава во учебната 2024/2025 година.

Во двете средни општински училишта во Струмица, СОУ „Јане Сандански“ и СОУ „Димитар Влахов“ денеска 417 нови средношколци го започнаа образованието, а во учебната 2024/2025 година од прва до четврта година ќе следат настава 1504 ученици.

Од 1 јануари училиштето „Никола Карев“ во Струмица, од општинско се трансформира во државно средно училиште – Регионален центар за стручно образование и обука за југоисточниот регион „Никола Карев“ Струмица.