Во наредните десет дена младиот компир во струмичко да се откупува по 20 денари за килограм

Во наредните десет дена младиот компир да се откупува по цена од 20 денари за килограм без одбитоци. Ваков договор постигнаа откупувачите и земјоделците од селата Иловица и Штука кои два дена протестираа поради ниската откупна цена на компирот. Договорот беше постигнат  на предлог и со посредство на дополнителниот заменик министер за земјоделство шумарство и водостопанство, Цветан Трипуновски кој денеска имаше средба и со земјоделците и со откупувачите. Според постигнатиот договор после десет дена сите засегнати страни со посредство на министерството повторно треба да остварат средба и согласно состојбите на пазарот да ги договорат следните чекори.

Според првичните проценки, за договорениот период од 10 дена треба да бидат откупени околу 700 тони млад компир само од регионот на општина Босилово.

• Земјоделците од Иловица и Штука блокираа пат поради откупната цена на младиот компир од само 15 денари

Протестите со целосна блокада на раскрсницата што води кон двете села, Иловица и Штука започнаа вчера во знак на револт поради ниската откупна цена од 15 денари за килограм која според земјоделците не ги покрива ниту основните трошоци за производство. Нивното првично барање беше минимум 25 денари за килограм.