Денеска во селото Колешино, општина Ново Село, официјално е поставен камен-темелник на нова училишна спортска сала покрај Основното училиште „Видое Подгорец“, како дел од проект за унапредување на спортската инфраструктура во локалната заедница. Проектот е реализиран по апликација на општината за средства обезбедени преку унгарскиот кредит посредуван преку Министерството за локална самоуправа, со цел подобрување на условите за физичко образование и спортски активности кај учениците и младите од подгорските населени места.
Градоначалникот на Општина Ново Село, Ѓорѓе Божинов, истакна дека оваа спортска сала е долгогодишно барање на мештаните, особено на децата од подгорските села, кои до сега беа во неповолна позиција бидејќи најблиската сала со услови за спортски активности се наоѓа во централното населено место на општината. Со новата сала, како што потенцираше, ќе им се овозможат услови за редовно вежбање, надградување и развој на спортскиот дух.
Премиерот Христијан Мицкоски, кој заедно со градоначалникот го означи почетокот на изградбата, подвлече дека ваквите проекти се пример за позитивно влијание врз квалитетот на животот на локалното население. Тој истакна дека Владата ќе продолжи да ги поддржува општините во реализацијата на капитални проекти ветени пред граѓаните, нагласувајќи дека инфраструктурните инвестиции преку општините достигнуваат значителни износи на национално ниво.
