Во Босилово промовирана книгата „Македонци – милениумски сведоштва за идентитетското име“

Во повеќенаменскиот центар во Босилово синоќа се одржа промоција на книгата „Македонци – милениумски сведоштва за идентитетското име“ (документи и анализи) од тетовскиот историчар и публицист Бранислав Светозаревиќ Покорни. Делото претставува научен труд со комбинација на извори и анализи.

„Книгата е сублимат на голем дел досегашни сознанија и истражувања од македонската историска наука. Ова беше составување на камчињата на мозаикот со оглед на тоа дека во нашата држава беа направени многу монографии кои потсетуваат на името на државата, на јазикот, на црквата но на етнонимот немавме една така посублимирана студија која ќе ги обедини сите оние сознанија кои ги имавме досега“, вели авторот Бранислав Светозаревиќ Покорни.

Тој посочи дека книгата е создадена врз база на над 1000 документи и сведоштва од 32 постоечки и непостоечки држави од сите меридијани при што нашол документи во светските архиви што претставува неизбришлива трага за македонското постоење.

„Мотивот беше она што во последните години сме сведоци, а тоа е нападот врз нашиот идентитет и сметав дека книгата ќе даде придонес во јавноста и науката. Тие документи репрезентативни примероци со значење во својот период и има документи кои прв пат се објавуваат. Се уште се воодушевувам зошто еден цар на Хабсбуршката монархија го споменува македонскиот народ, зошто една руска царица го споменува македонскиот народ. Зборуваме за 17 и 18 век и се покажа од истражувањата дека ништо не било случајно се имало свој тек и се има логичен развој“, додава Светозаревиќ.

„Вистината за Македонија и Македонците спакувана во безвременското дело на др. Бранислав Светозаревиќ. Од денес училишните библиотеки во општина Босилово ќе бидат побогати со оваа прекрасно дело кое сведочи за македонштината низ вековите“, напиша на Фејсбук градоначалникот на општина Босилово, Ристо Манчев по промоцијата на „Македонци – милениумски сведоштва за идентитетското име“.

Авторот Бранислав Светозаревиќ Покорни е роден 1966 година, а научно истражувачката дејност ја врши во областите на историјата, архивистиката, музеологијата и културата.