ВМРО-ДПМНЕ отвори Регионален Изборен штаб во Струмица

Синоќа во центарот на Струмица, ВМРО-ДПМНЕ отвори Регионален Изборен штаб на 4-та Изборна единица од каде ќе се организира кампањата за Претседателските и Парламентарните избори во оваа изборна единица. Штабот се наоѓа на првиот кат од објектот на хотелот „Есперанто“, на местото на поранешниот кафе бар „Gossip“.

„Не очекува многу важен период во кој треба да бидеме сите максимално ангажирани, мотивирани, единствени за да двојната победа на ВМРО-ДПМНЕ ја направиме што поголема и поубедлива. ВМРО-ДПМНЕ на претстојните Претседателски и Парламентарни избори ќе настапи со одличен кандидат за претседател на Република Македонија, тоа е професорката Гордана Силјановска Давкова, но и со квалитетни лица на пратеничките листи со реална, квалитетна програма, платформата #1198“ – кажа Жан Дрвошанов претседател на ОК на ВМРО-ДПМНЕ во Струмица и кандидат за пратеник.

Пред народот, членови и симпатизери на ВМРО-ДПМНЕ, граѓани на Струмица и регионот се обратија носителот на 4-та Изборна единица и потпретседател на партијата, Александар Николоски, членот на Извршниот комитет и коносител на листата, Антонио Милошески и кандидатот за пратеник, Петар Марков од Ново Село.

„Народот нема кратка меморија и многу убаво се сеќава дека најголемите афери во здравството, најголемиот криминал во здравството се случи токму во мандатот на Венко Филипче. И јас искрено мислев дека ќе избега од политиката и ќе моли Господ да се заборави, да помине време некако да се „шмукне“ и да не одговара и на тој начин да се спаси. Ама не, тој реши да се врати во политиката“ – кажа Александар Николоски поставувајќи му неколку прашања на противкандидатот од СДСМ, Венко Филипче.

„Како е неговата улога и мислење за 14-те луѓе коишто живи изгореа во модуларната болница во Тетово? Како тоа стерелизацијата во сите здравствени установи во Македонија на јавно-приватно партнерство се даде на фирма од Албанија? Како Македонија последна доби вакцини и дали е тоа поврзано со фирмата „Сабри“ којашто беше регистрирана во Хонг Конг за трговија со банани и друго јужноамериканско овошје и од којашто провизиите стигнаа, ама вакцините не стигнаа? Каква е неговата улога врз притисокот на сопственикот на една приватна болница да истата ја продаде на „Клодијан Алајбеу“ од Албанија? Каква е неговата поврзаност со семејството Пановски и случајот „Онкологија“ кадешто на болни од рак не им се давале терапија со цел некој да става пари во џеб? Дали не го гриже сосвест што Македонија по смртност, по црна статистика во време на коронакризата, кога секој ден држеше прес конференции и само на личен рејтинг работеше, е 5-та во светот?“ – го праша Николоски на Филипче.

„Бидете свесни дека вашиот глас многу ќе значи за тоа да формираме стабилна Влада без ДУИ и стабилна Влада на ВМРО-ДПМНЕ којашто Македонија ќе ја извади на правиот пат. Затоа секој глас за ВМРО-ДПМНЕ е глас за стабилна, развиена Македонија којашто ќе оди по вистинскиот пат“ – кажа Антонио Милошески, член на Извршниот комитет и кандидат за пратеник.

„Оној којшто решил да го стави името на Јована Тренчевска на пратеничка листа во Струмица значи дека е против учениците, дека е против родителите и дека е против семејството“ – кажа Петар Марков остро напаѓајќи ги носителот и коносителот на листата на СДСМ во „четворката“, Венко Филипче и Јована Тренчевска.

„Гледам некои од најтврдокорните активисти, сакаат да направат, да изградат некој мит од името на Венко Филипче, демек он многу се грижел за пациентите, он помагал на луѓето да дојдат до третман. Ако постои една единствена задача којашто ја има министер за здравство, не да ја користи неговата моќ на позиција којашто му е дадена за да фаќа врски за операции и прегледи на пациентите. Министерот за здравство треба да направи здравствениот систем во Македонија да функционира, да не мора пациентите да вртат телефони, да носат кафиња за да можат да го добијат нивниот посакуван третман“ – кажа Марков.

Од отворањето на Регионалниот изборен штаб беше испратена и поканата до сите граѓани за присуство на Митингот на ВМРО-ДПМНЕ во Струмица, кој ќе се одржи во среда од 20:30 часот кај Чешмичката во големиот градски парк, а на кој ќе се обратат кандидатот за претседател Гордана Силјановска Давкова и лидерот на партијата, Христијан Мицкоски.

ФОТОГАЛЕРИЈА