На три часа пред истекот на рокот за доставување на листи за советници, како и на кандидати за градоначалници до Општинските изборни комисии, ВМРО-ДПМНЕ и официјално ја достави листата за Советот на општина Струмица со 23-ца членови.
Носител на листата е д-р Никола Маџунков, кој е во сегашниот состав на Советот на општина Струмица и координатор на советничката група на ВМРО-ДПМНЕ, зад него е Евица Трајанова, претседателка на Унијата на жени, трет е Владимир Ристов, актуелен советник и секретар на ОК на ВМРО-ДПМНЕ Струмица. Во првата „сугурна“ десетка за која се надеваат двете најголеми политички партии во Струмица се и Пале Галева, дипломиран правник, Кире Синдраковски, дипломиран машински инжинер, д-р Анкица Ангова, очен лекар и поранешна директорка на струмичката болница, Кемал Сулејманов од ромската заедница, Мила Велкова од Куклиш, професорка по биологија, д-р Методија Иванов – кардиолог во ЈЗУ „Општа Болница“ Струмица и Јован Симевски – раководител на Одделението за катастар и недвижности во Струмица. Следуваат: Кристина Ментинова Манчева, Панчe Стојков, Петре Танчев, Никола Андонов, Елена Пандева, Методија Пасков, Ели Велева, Ѓорѓи Христов, Милица Миова, Трајче Трајков, Софче Јанева, Христијан Ефтимов и Меланија Ристова.
„Граѓаните заслужуваат нова енергија, нова визија и вистински луѓе кои ќе стојат цврсто зад зборот и делото. Време е за вистински промени! Време е за Струмица да добие чесно, одговорно и посветено водство. Со поддршка од вас и со силата на нашето единство, сигурен сум дека ќе изградиме подобра и посветла иднина за сите“ – објави носителот на советничката листа на ВМРО-ДПМНЕ, Никола Маџунков.
Заедно со кандидатите за членови на Советот, ОК на ВМРО-ДПМНЕ до Општинската изборна комисија вечерва официјално ја достави и кандидатурата на Петар Јанков за градоначалник на општина Струмица.
