„Чувството на безбедност е големо, значи генерално граѓаните се чувствуваат безбедно, а тие што не се чувствуваат така, како главен проблем за тоа ги посочиле кучињата скитници, меѓутоа сите знаеме дека општина Струмица има Стационар и овој проблем се решава. Граѓаните изразиле задоволство од службите за брзи интервенции, како што се пожарна, полиција и брза помош, наведувајќи дека се лесно достапни, а побарале и поголемо присуство на полицијата на терен, односно маалски полицајци, за да чувствуваат поголема безбедност“, кажа Ѓорѓи Аризанов секретар на Локалниот совет за превенција на денешната 14-та работна конференција која се одржа во Домот на АРМ во Струмица на која на дневен ред беа ставени три актуелни теми: градење клима на доверба и добросостојба во училиштата, узурпација на јавните површини, тротоарите во градот и истражувањето на тема „Со локални совети за превенција кон подобра соработка“, спроведено од невладината организација Евротинк со која Општина Струмица има соработка.
На работната конференција, во присуство на директорите на воспитно – образовните институции и педагошките служби коишто се во склоп на државните институции се говореше за проблеми коишто се случуваат во училиштата, како што се говор на омраза, врсничко насилство, булинг и слично.
„Во општина Струмица нема проблеми од пошироки димензии, добро е што ги нема и не треба да ги има, меѓутоа ова тело како превенција е алатка којашто не треба да ги решава проблемите кога ќе се случат, туку, да разговараме предвреме за проблеми коишто во иднина би можеле да се случат“, кажа Аризанов.
