Agents of Time, Meduza, Layla Benitez, Senidah ќе ги освојуваат младите струмичани на Get EXITed – забава до зори на 6 септември

Италијанско електронско дуо „Agents Of Time“, италијанско-шведско трио „Meduza“, њујоршката афро-хаус дива Layla Benitez неприкосновена кралица на балканската трап и поп сцена Senidah, како и 2Bona, Young Dadi, Zee, Matej Foltz, DJ Popeye и струмичката „Дивизија“ се учесниците кои годинава ќе настапат на Get EXITed настанот во Струмица на 6-ти септември (петок). Сите тие на сцената во големиот градски парк ќе донесат различни жанрови, ненадминливи хитови и ритам за забава.

Драги Кискинов од „Дивизија“, градоначалникот на Струмица, Костадин Костадинов и Милица Драгомировиќ од Get EXITed го најавија 3-то издание на овој музички настан.

„Мисијата на „EXIT“ од неговото основање е поврзување на регионот и промовирање на мирот. Врската што EXIT ја гради со Македонија речиси четврт век е нераскинлива, а Get EXITed е само уште еден начин за дополнително зајакнување на таа врска. По две успешни изданија, неверојатно се радуваме на уште едно дружење со нашиот македонски тим, а со неверојатната програма што ја подготвивме, сигурни сме дека и публиката со нетрпение ја очекува“ – кажа Драгомировиќ.

За градоначалникот на Струмица, Костадинов фестивалот „Get EXITed“ за краток временски период се етаблираше како еден од настаните во годината кој со нетрпение го очекуваме, обединувајќи светски и регионални ѕвезди на едно место кои придонесуваат за незаборавно искуство под струмичкото небо.

„Успехот на овој фестивал е доказ за вистинската, братска соработка помеѓу соседни земји како Србија и Македонија, за посветеноста и ангажманот на сите инволвирани страни, од организаторите до уметниците и се разбира ентузијастите во публиката. Струмица продолжува да демонстрира квалитети на регионален центар, домаќин на настани од светска класа, а годинашното издание на фестивалот, кој прераснува во традиција, ќе биде само уште една потврда за ова“ – кажа струмичкит градоначалник.

Кискинов вели дека како локален музичар, овој настан за него има посебна важност.

„Get EXITed“ е повеќе од фестивалска сцена – овој фестивал е платформа која нуди можност да го прикажеме неверојатниот талент што го имаме во нашата држава. Покрај присуството на светски познати имиња, овој фестивал креира можност за локалните артисти, како мене да ја претстават својата музика и талентот пред пошироката публика“ – кажа Кискинов.

На Get EXITed во Струмица досега учествуваа врвни уметници од глобалните и регионалните сцени, како што се Џон Њуман, Бурак Јетер, Дебора Де Лука, Махмут Орхан, Констракта, Ван Гог, Лана и многу други. По минатогодишното издание, кое привлече над 20.000 ентузијастички фанови, „Get EXITed“ повторно се враќа во струмичкиот парк, ветувајќи уште едно збогум на летото исполнето со музика и игра.