Музичко училиште во Струмица новата учебна година ја стартува со дополнителни нови простории

Струмичкото музичко училиште „Боро Џони“, кое е изградено во 1991 година доби дополнителни нови простории – кабинети по музика. Отстранет беше стариот кров и изграден нов кат и нова кровна конструкција. Инсталирана е нова водоводна и електрична мрежа, нови инвертер уреди, поставен е и лифт, пристапна рампа за учениците со посебни потреби, како и нова термо фасада на целиот објект.

Со овој проект кој го реализираше Министерството за образование и наука, а во соработка со Општина Струмица, учениците и вработените сега имаат дополнително повеќе простор и подобрени услови за изведување на настава.

„После една децениска желба, после една децениска макотрпна работа заедно со Општина Струмица успеавме денеска на 1 септември музичкото училиште да започне со работа во ново руво. Тоа нашите ученици го заслужуваат, го заслужуваат и идните генерации ученици, го заслужуваат вработените кои секојдневно се докажуваат со своите успеси на државно и на меѓународно ниво. Тоа го заслужува и Општина Струмица која секогаш дава поддршка и подава рака во секој момент“ – кажа директорката Клара Патарова пресреќна што новите простории се ставаат во функција токму на стартот на новата учебна година.

Градоначалникот на општина Струмица, Костадин Костадинов денеска при посетата на ООМУ „Боро Џони“ и сечењето на црвената лента на новите простории изрази задоволство од успешноста на овој проект, кој се реализираше во предвидениот рок од девет месеци, потенцирајќи дека истиот се направи заради потребите кои ги имаше музичкото училиште во однос на нови кабинети за настава, бидејќи како што кажа, „ако се земе во предвид фактот дека во почетоците училиштето имало 13 вработени и 120 ученици, а денес околу триесеттина вработени и околу 300 ученици, тоа ни дава за обврска да реализираме проекти какви што реализираме денес“.

• Доградбата на музичкото училиште „Боро Џони“ во Струмица во завршна фаза – објави министерот Јетон Шаќири

Градежната фирма „Атриум“ од Вевчани го доби тендерот на Министерството за образование и наука за доградба на училиштето „Боро Џони“ во Струмица, која во декември минатата година започна со реализацијата.