Струмичани се потпишуваа во „отворената книга“ на плоштадот искажувајќи го својот став против отворањето рудник

Вечерва активистите на еколошките здруженија „Здрава Котлина“ од Струмица и „Еко Долина“ од Ново Село на плоштадот „Гоце Делчев“ во Струмица го организира настанот насловен: Еко повик – „Потпиши се против рудникот на смртта“, каде граѓаните со ставањето потпис во „отворенета книга“ го искажуваат својот став против отворањето на рудникот кај Иловица, потенцирајќи дека отворањето на рудникот е сериозен проблем кој може долготрајно да и наштети на струмичката котлина и целата флора и фауна која егзистира на оваа територија.

Од настанот еко-активистите повторно ја испратија пораката до Владата за целосно раскинување на договорите за концесиите. Поддршка добија и од Викарниот Епископ Стобиски г. Јаков, кој заедно со неколку свештеници на Струмичката Православна Епархија се потпишаа во „отворената книга“.

Граѓаните имаа можност во живо да ги слушат младите музичари од вокално-инструменталниот состав „Стихири“, литературната интерпретација на Мариета Дукиќ и излагањето на Коста Милков. Беше прикажан и документарен филм во кој се објаснети штетите од отворањето на рудникот, а пред граѓаните се обратија и неколку еко активисти кои најавија дека ќе продолжат со собирање потписи и во наредниот период во населените места и останатите општини во струмичкиот регион.

ФОТОГАЛЕРИЈА