Струмица ја одбележа 19-годишнината од загинувањето на претседателот Борис Трајковски

Со пригодна свеченост пред споменикот „Македонија“ во големиот градски парк во Струмица, денеска беше одбележана 19-годишнината од загинувањето на Борис Трајковски, вториот претседател на Република Македонија.

„А може ли болката да не е толку многу голема, кога на денешен ден пред 19 години, изгубивме Претседател, изгубивме Македонец, изгубивме струмичанец, изгубивме млад човек на 48-годишна возраст, изгубивме доблесна личност со многу човечки вредности, и како политичар, и како верник, и како сопруг и татко, и како вљубеник во својот град и својата земја. Тој студен четврточен ден го изгубивме Борис Трајковски, вториот Претседател на Република Македонија. Тоа е една од најголемите загуби во поновата историја на нашава татковина, загуба која остави голема празнина кај сите нас“, кажа меѓудругото во своето обраќање градоначалникот на Струмица, Костадин Костадинов.

Во знак на почит, свежо цвеќе пред споменикот положија претставници на семејството Трајковски, градоначалникот и членови на Советот на општина Струмица, во име на Владата, министерката за труд и социјална политика, Јована Тренчевска и директор на Бирото за јавни набавки, Борче Хаџиев. Цвеќе положија и претставници на политичките партии од Струмица, СДСМ и ВМРО-ДПМНЕ. На одбележувањето присуствуваа и дел од членовите на Бордот на Федерацијата на Европските карневалски градови предводени од претседателот Ларс Алгел кои деновиве присуствуваат на Струмичкиот карневал.

Традиционално, секоја година на годишнината од загинувањето на претседателот Борис Трајковски, членови на Унијата на жени при ОК на ВМРО-ДПМНЕ во Струмица, спроти споменикот „Македонија“, заедно со претседателот на струмичкиот комитет, Жан Дрвошанов засадија дрвце.