Облак од густ црн чад се гледаше од повеќе точки на Струмица – пожар во месноста Софилар

Облак од густ црн чад се гледаше од повеќе точки на градот Струмица, на поголема оддалеченост. Во близина на комплексот нови згради во месноста Софилар денеска напладне избувнал голем пожар, кој потпомогнат од силниот ветер со голема брзина се движел кон првите објекти и магацини. Била запалена депонија, а гореле и уште десеттина локации со стрништа.

Дваесеттина пожарникари со три противпожарни возила интервенираа во гасењето на пожарот, а благодарение на брзата интервенција спречено е доближување до објектите. Екипи со пожарникари сé уште се на терен и вршат догасување на одредени џебови од пожарот. Силниот ветер го отежнува гасењето.

Во моментов екипи на ТППЕ Струмица работат и на активни пожари во атарот на селата Владевци, општина Василево и Дражево, општина Ново Село.