Денеска напладне и во Струмица како и во многу градови и села низ Македонија се одржа традиционалното празнување на празникот Богојавление – Водици. Во базенот „Аквариус“, откако се изврши осветување на водата од страна на свештеници на Струмичката Епархија при Македонска Православна црква – Охридска Архиепископија, отец Стоил Димитриев го пушти Светиот крст, а среќата прв да го најде во водата меѓу 20-те струмичани ја имаше 23-годишниот Васко Дрвошанов од Куклиш, кој по втор пат во Струмица се обиде да го фати, а претходно шест пати учествувал во фаќањето на крстот во осветени води во неговото Куклиш.
„Убаво ми е, овој празник ми е најубав… На сите здравје, среќа…“ – кажа Васко во изјава за медиумите, откако излезе од студената вода со крстот в рака.
На среќниот наоѓач, заменичката градоначалник Елена Магеровска Паликарова му подари Крст од XII век „Реликвијар“, односно копија од крстот пронајден во ископините на Цареви кули кој упатува на Свети Ѓорѓија. Тој исто така доби подароци од повеќе спонзори на ова манифестација.
Порака за благосостојба до верниците упатија свештениците од Струмичката Епархија со традиционалното христијанско честитање на празникот „Бог се јави“.
Со свечена Богојавленска литургија празникот Водици денеска беше одбележан во сите Православни храмови во Струмичката Епархија.
