И годинава зборното место пред споменикот „Македонија“ во големиот струмички парк. Петнаесеттина планинари од Струмица, Валандово, Гевгелија, Радовиш и Штип, тргнаа на пат кон Скопје, долг околу 200 километри, за да на 26 февруари, денот кога загина македонскиот претседател Борис Трајковски, родум од Струмица, му оддадат почит на вечното почивалиште во Скопје.
И по 21 година од авионската несреќа кај Мостар, во која загина претседателот Борис Трајковски и негови соработници, почитта и делата на Трајковски сé уште ги обединува планинарите, кои беа и негови пријатели, да изодат пеш 200 километри и му се поклонат пред гробот во Скопје, но и да не поттсетуваат на него, на неговата љубов кон татковината Македонија.
„За жал се помалку ги има младите планинари кои сакат да пешачат до Скопје“, вели претседателот на Планинарскиот клуб „Ентузијаст“ од Струмица, Андон Спасов, надевајќи се дека догодина ќе има и млади, бидејќи тие што денеска тргнаа се во поодминати години. Меѓу нив е и 69-годишниот Лазар Митрев, планинар од Валандово, кој веќе осма година оди на овој марш од Струмица до Скопје. И тој жали што нема млади да го продолжат овој марш, но се чуствува среќен и горд што по патот ги поздравуваат голем број граѓани и со нив евоцираат спомени за претседателот Борис Трајковски.
Викендот ќе се одржи уште еден настан во чест на претседателот Борис Трајковски, а во организација на ПАОК „Ентузијаст“. Четириесеттина планинари од Македонија и Бугарија денеска и утре ќе пешачат и по падините на планината Беласица. Тие ќе се искачат на врвот „БоТра“, кој го носи името на претседателот и е на надморска височина од 1.880 метри. Како што кажа Никола Ристов, со оваа заедничкото искачување на врвот „БоТра“, планинарите од двете држави ќе упатат порака за Балкан без граници, за што се залагаше и претседателот Борис Трајковски.
