Пред Споменикот на Револуцијата во струмичкиот градски парк, во организација на Општина Струмица денеска се одржа чествување за Народниот херој Благој Јанков Мучето, по повод 80-годишнината од убиството.
„Во оваа прилика, кога ја одбележуваме 80-годишнината од денот на загинувањето на струмичкиот Народен херој, не смее да се заборави дека, да ако не се случеше тој 14-ти јули 1944 година, Благој Јанков Мучето многу наскоро ќе се израдуваше на два значајни настани од нашата историја. Само 19 денови го делеа од Првото заседание на АСНОМ во манастирот Свети Прохор Пчињски, на кој требаше да биде еден од делегатите. Исто така, неполни два месеца го делеа Мучето, за да го доживее ослободувањето на родната Струмица. За жал, за Мучето и едното и другото останаа само недосонувани соништа. И до ден денес, но и за вечни времиња, останува да се каже дека Народниот херој Благој Јанков Мучето, беше, е, и ќе биде наша струмичка гордост“ – кажа Македонка Глигорова, член на Советот на општина Струмица.
По одржаниот говор за Мучето, претставници на Општина Струмица, на здруженија на граѓани, политички партии и јавни установи положија свежо цвеќе пред Споменикот на Револуцијата во големиот градски парк и пред бистата во малиот градски парк, а стихови за Благој Јанков Мучето кажуваа членови на рецитаторската секција при Домот за деца и млади кој го носи името на Народниот херој.
