ЈПКД „Комуналец“ од Струмица ја реализираше есенската акција за чистење на улиците и јавните површини во градот, со која вчера беа опфатени делови од Булеварите „Маршал Тито“, „Ленинова“ и „Гоце Делчев“, како и улиците „Балканска“, „Маршал Тито“, „Гоце Делчев“, „Сандо Масев“ и „Невена Стојкова“.
Од јавното комунално претпријатие информираат дека акциите за одржување на јавната хигиена се спроведуваат континуирано со цел создавање почиста и поуредена животна средина за сите граѓани на општина Струмица.
Воедно, од „Комуналец“ упатија апел до граѓаните за повисока совесност при одлагањето на отпадот. Тие потсетуваат дека кабастиот отпад треба да се остава исклучиво во пластични вреќи во контејнерите, а градежниот шут, делови од покуќнина, треви и гранки од дрвја не треба да се оставаат на тротоарите.
Секој граѓанин кој има ваков вид отпад може да се јави на бројот 13-110, по што службите на претпријатието ќе го подигнат отпадот од пријавеното место во договорен термин.
„Со нашето секојдневно присуство и активности на терен, како и со одговорното однесување на сите граѓани, можеме заеднички да ја подобриме сликата на почиста и поуредена Струмица. Продолжуваме со наредните акции и веруваме дека со се поголема совесност ќе добиеме почист град каков што сите го посакуваме“, порачуваат од ЈПКД „Комуналец“.
