Јордан Симонов е годинашниот лауреат на Фестивалот на камерен театар „Ристо Шишков“

Престижната награда за највисоко актерско остварување на 31-то издание на Фестивалот на камерен театар „Ристо Шишков“ ја доби Јордан Симонов за улогата на Павле во претставата „Лагата“ од Флоријан Зелер, во режија на Бесфорд Идризи, а во изведба на Македонскиот Народен Театар од Скопје. Ова го соопшти вечерва претседателката на стручната жири комисија, Дарја Ризова на затворање на годинашниот фестивал во Струмица.

„Јордан Симонов со внимателно избрани актерски средства, успева да оствари моќна и осмислена улога. Тој покажува особено чувство за партнерска игра и вешто го води ликот, кој во себе крие тајни, од привидна наивност до длабока перфидност. Со својата способност за трансформација, Јордан Симонов доминира на сцената, субверзивно поигрувајќи си со очекувањата на публиката, на работ меѓу комичното и неверојатното, меѓу лагата и вистината“, кажа актерката Дарја Ризова во образложението за доделувањето на наградата на Симонов.

Актерот Јордан Симонов добива златен медалјон со ликот на Ристо Шишков и парична награда од 1.500 евра, која ќе му биде дополнително врачена, бидејќи актерот не беше на затворањето на фестивалот и соопштувањето на наградите.

Покрај главната награда жири комисијата во состав, минатогодишната лауреатка Дарја Ризова, писателот и професор на ФДУ, Иван Додовски и актерката Мими Таневска одлучи да додели и специјална награда за млад актер како поттик на новите генерации актери да го негуваат камерниот театарски израз, а ја доби Даријан Петров за актерски доследен пинтеровски израз во градењето на ликот на Меккен во претставата „Роденден“ од Харолд Пинтер, во режија на Васил Христов, а во изведба на Народниот тетар од Штип.