![almak](https://strumicanet.com/wp-content/uploads/2025/07/1080x206-srnet-optimized.png")
Денеска во Кабинетот на градоначалникот на општина Струмица, амбасадорот на Јапонија во Македонија, Оцука Казуја и директорката на ЈЗУ „Општа Болница“ Струмица, Катерина Кузмановска потпишаа договор за „Грант помош на мали проекти за човекова безбедност“ (GGP). Станува збор за набавка на 4Д ултразвучен систем за Одделот за Гинекологија, во вкупен износ од 51.462 евра од Јапонската амбасада.
„Ja користам оваа прекрасна можност да се заблагодарам на пријателска Јапонија, Aмбасадата на Јапонија во Северна Македонија и Н.Е. Aмбасадорот Оцука Казуја, за оваа прва поддршка од GGP-програмата“ – кажа во своето обраќање заменик градоначалничката Елена Меѓаровска Паликарова.
Амбасадорот Оцука вели дека јапонскиот народ е среќен и горд што му помага на македонскиот народ да има поквалитетни здравствени услови.
„Новиот ултразвучен систем ќе обезбеди поголема здравствена заштита на трудниците и новороденчињата во нашата болница и пошироко во југоисточниот регион“, кажа директорката на струмичката болница, д-р Катерина Кузмановска, која заедно со амбасадорот Казија и неговата сопруга го посетија Одделението за Гинекологија во ЈЗУ „Општа Болница“.
Преку проектите од програмата за мали грантови (GGP), Јапонија има финансирано реновирање и набавка на опрема за повеќе од 74 училишта и градинки, 66 здравствени установи и обезбеди 35 специјализирано возило за управување со отпад и комунални услуги за 51 општина.
Јапонија континуирано ја поддржува Северна Македонија во различни сектори, како инфраструктурен развој, подобрување на здравствените услуги, образованието, животната средина, култура, помош при природни катастрофи и бегалски кризи, како и итна помош која изнесува повеќе од 423 милиони евра, како и друга нефинансиска помош.
