![almak](https://strumicanet.com/wp-content/uploads/2025/04/srnet-banner-sofa-bed-garnituri-2025-optimized.jpg")
Скромно девојче кое наоколу скришум шара со убавите очи, тивка кога зборува, но со моќен глас кога пее – Славица Ангелова новата ѕвезда на „Гранд“ по победата се врати во родниот град. Не залудно Струмица ја нарекуваат Ѕвезден Град, град кој во разни времиња и периоди раѓа големи ѕвезди во музиката, спортот, културата… Уште една ѕвезда под Царевите Кули во наредните години ќе ги прави струмичани горди.
Дојде синоќа да ги поздрави струмичани, да им се заблагодари за поддршката, да им запее. Дојде со својот ментор, Ѓорѓе Давид, а ги донесе градоначалникот Костадин Костадинов. Тој и општината ѝ организираа пречек во Големиот градски парк, на сцената подготвена за неа, и за уште многу млади музичари од Школата за гитара на професорот Васко Пиличев кои и свиреа и ја пратеа во нејзиното пеење.
„Имате европски пејач во своите раце, Славица и те како ќе го претставува својот град. Јас од своите финалисти не се откажувам, ги имав тројца, Славица е победник и мислам дека ѝ претстои сјајна и брутално убава кариера. Таа е едно најскромно, највоспитано, најталентирано створение кое многу сериозно сфаќа сѐ на што ќе се дофати“, кажа Ѓорѓе Давид, најавувајќи дека многу брзо Славица ќе ја претстави Македонија, не само на Балканот, туку и во Европа, не откривајќи за што станува збор.
Просторот пред влезот на Големиот градски парк беше полн со различни генерации на струмичани, уживаа во пеењето на Славица, потпевнуваа со неа на познати ЈУ хитови кои таа многу моќно во еден здив ги отпеа. Овде беа и нејзините родители, мама и тато скришум и со сјај во очите ја гледаа својата гордост, која на 21 година стана ѕвезда на Балканот.
Кратко траеше концертот, но многу долго Славица не можеше да си замине од пред сцената. Најмладите обожователи, децата, но и по некој повозрасен сакаа да си направат „селфи“ со неа. Таа стрпливо се фотографираше со секој. Организаторите некако успееја да ја повлечат и да си замине, ако останеше ќе имаше „селфиња“ до сабајле.
