![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Граѓанското здружение „Струма“ од Струмица, денеска традиционално по 19-ти пат во Вилата на семејството Лазарови, во реонот познат меѓу струмичани „кај лозињата“, го изведе традиционалниот Ѓурѓовденски обичај.
„Ѓурѓовден е најголемиот пролетен празник со кој почнува летниот период кој трае се до Митровден. Најпрвин момите излегуваат на ливада, во поле, кинат од разбудената вегетација, се лепат со растението народски познато како „лепешка“ верувајќи дека ќе имаат среќа во љубовта“ – ни рече Добрила Достинова, претседател на Граѓанското здружение „Струма“.
Во делот на струмичките обичаи поврзани со овој празник, девојките врзуваат лулашка на дрва кои се симбол на плодност и јачина и тука се нишале верувајќи дека годината ќе им биде среќна и бериќетна.
„Официјално уште од 2004-та година, овде на овој имот, благодарејќи на семејството Лазарови, ја негуваме традицијата на Ѓурѓовден. Овде денеска ги изведувавме македонските обичаи, собиравме билки, имавме нишење на нишалка, китење со зеленило и лепење со леплива трева (лепешка), за да се лепат момите и егрените, се пееја и песни, се играа традиционални македонски ора од страна на КУД „Св. Кирил и Методиј“ од Иловица, а за музичката забава се погрижи групата „Рефлекс“ од Кочани“ – додаде Достинова.
За домаќинката на Вилата на Лазарови, Виолета, овој ден е посебен за нив и горди на веќе 19-та година одбележување на Ѓурѓовден и оваа прекрасна соработка со Здружението „Струма“.
Домаќинката за гостите подготви традиционални македонски погачи во фурна, а не изостана и скарата и по некоја чашка домашна ж’та за повозрасните, 10-годишна подготвена од домаќинот Живко Лазаров.
