Шумски пожар кај Доброшинци, интервенираат пожарникарите

Регионалниот Центар за управување со кризи – Струмица известува дека во последното деноноќие кај струмичкото село Доброшинци, општина Василево, е активен шумски пожар. Според соопштението, гори сува трева и ниска шума, а дел од пожарот навлегува во шумата и се движи кон планината Готен. Утрово на терен се екипи кои дејствуваат за гасење на пожарот. Според последната информација, 21 пожарникар со пет противпожарни возила од Територијалната противпожарна единица – Струмица интервенираат во нискиот дел на опожарениот реон.

Како што стои во соопштението, ЦУК е известен од ШС „Беласица“ – Струмица, подружница на ЈП „Национални шуми“, дека тие не можат директно да учествуваат во гасењето на пожарот затоа што немаат здравствено осигурување, па единствено помагаат со логистиката.