Центарот за култура „Антон Панов“ од Струмица ја објави Годишната програма за 2025-та, поддржана од Министерството за култура и туризам

Активностите на НУ Центар за култура „Антон Панов“ од Струмица во оваа 2025 година ќе бидат поддржани од Министерството за култура и туризам со 3.910.000 денари. Најмногу за драмската дејност, 2.500.000 денари, односно за реализација на три нови претстави кои ќе бидат поставени на театарската сцена во текот на оваа година. „Прекрасни светови“ од Митко Бојаџиски во режија на Стајко Мурџев за која се одобрени 700.000 денари, „Мизантроп“ од Молиер во режија на Дамјан Тенев – 900.000 денари и исто толку пари за претставата „Син“ од Флоријна Зелер во режија на Благој Мицевски.

За музичката и музичко-сценската дејност одобрени се 260.000 денари за четири настани. Концерт на Лазар Соколов и Емилија Кабранова Филипова, Фестивал на „Источно-црковно пеење“, Музички мозаик: „Средновековна Европа до Медитеранот“ и Концерт на класична музика со гитара и пијано.

Одобрени се и дополнителни 330.000 денари за поддршка на фолклорот, односно Фестивалот на староградски песни „Под кулите на Струмица“, за активностите на Ансамблот „Распеани Струмичани“ и на новоформиранито културно-уметничко друштво „Боро Џони“ кои работат во рамките на установата.

Од областа на визуелната уметност, архитектурата и дизајнот, Центарот за култура „Антон Панов“ од Министерството за култура и туризам ќе добие 820.000 денари, за реализација на повеќе активности и настани, како што се Меѓународиот фестивал на карикатура и афоризам, Меѓународната Струмичка ликовна колонија, за Изложба на македонски и бугарски сликари, Изложба на Христина Маркоска „Страв од непознатото“, за Меѓугалериска соработка, Изложба на Драгица Чакоровска „Апстрактни видувања“, Постхумна изложба на сликарот Ѓорѓи Божинов – Фаника, Изложба на Томе Даневски „Глаголица“, Постхумна изложба на сликарот Димитар Филев и Изложба на Панче Ѓорѓиев „Уметникот и природата“.