Хотелот „Цар Самуил“ од Банско со 7 награди и признанија на Новосадскиот саем за туризам

Пехар за „Врвно ниво на развој на бањскиот и медицинскиот туризам“, вака гласи едно од вкупно 7-те престижни признанија што струмичкиот хидротермален медицински центар, односно хотелот „Цар Самуил“ од Банско, Струмица ги освои на вчерашното доделување награди во туристичкиот сектор на гала настанот „Вечер на шампиони“ што се одржа на Новосадскиот саем за туризам.

„За симболиката да е уште поголема, доделувањето на овие престижни признанија се случи токму на денот на 41-от роденден на нашето познато бањско лекувалиште“, објавија од хотел „Цар Самуил“, потенцирајќи дека овој избор доаѓа како резултат на напорната работа и вложување во комплетната модернизација на комплексот „Цар Самуил“, што стручната комисија составена од врвни професионалци во туристичкиот сектор што го оценуваа квалитетот на туристичките објекти и услуги, ги издвои како достојни за ова признание.

„Цар Самуил“ беше избран како победник во уште шест категории: Континуирано вложување во иновативни технологии, Високо ниво на сместувачки капацитет, Модерен центар за рехабилитација, Современ евент центар, Посебен придонес во зачувување и реставрација на археолошкиот локалитет Римски терми и Термален и велнес центар со висок квалитет.

Ова препознавање на квалитетот што го нуди „Цар Самуил“ во Банско има големо значење и за мапирањето како реномиран медицински центар на регионалната, па и светската туристичка мапа.

Во име на тимот на „Цар Самуил“, наградите ги прими генералниот менаџер Горан Митров.

• Струмичкиот Bu Coffee House со златен медал на Новосадскиот саем
• Туристичката агенција „Нова Травел“ со посебно признание за развој на туризмот на Новосадскиот саем
• И „Шалом“ со златен медал на Новосадскиот саем