Струмичкиот фудбалски прволигаш ја започна кампањата „Ние сме Брера Струмица“ со која сакаат да направат симбиоза на фудбалот со убавините на градот, но и струмичани кои се препознатливи како верни навивачи и подржувачи на спортот.
За таа цел капитенот Марио Врдољак, Папе Оумар Сице како и младите, голманот Марко Алчевски, но и Ване Крстевски и Мартин Ѓоргиевски со фотографии ги промовираат убавините на Струмица кој претставува расадник на врвни спортисти, но и град кој изобилува со голем број значајни културно историски споменици.
„Со овој чекор сакаме да дадеме наш придонес кон афирмација на градот и како туристичка дестинација, но и да ги презентираме струмичани кои го сакаат и даваат поддршка на фудбалот, но и спортот воопшто. Од таа причина нашите фудбалери облечени во дресовите на клубот се фотографираа на повеќе значајни локации и преку семејството на „Брера“ имаме намера да ги презентираме убавините на Струмица ширум Европа, па и светот“ – стои во соопштението од клубот.
Со кампањата тие го презентираат локалитетот „Цареви Кули“, кој претставува заштитен белег на градот – археолошки локалитет каде се пронајдени остатоци од праисторијата, античкиот и средновековниот период. За богатата историја на Струмица сé уште сведочат кулите од 12-от век, ѕидините. како и големата палета на значајни аретефакти кои се изложени во градскиот Музеј.
Ја промовираат и зградата на Општина Струмица, која почнала да се гради од 1926 до 1931 година и по својата архитектура претставува вистинско ремек дело. Станува збор за објект каде во континуитет е сместена локалната власт која е голем поддржувач на спортот. Зградата е во стилот на неокласичната архитектура со декоративни елементи кои се со изразени западно стилски влијанија.
Врдољак, Сисе, Алчевски, Ѓоргиевски, Крстевски во зелени црни дресови преку фотографиите потсетуваат и на големиот македонски великан Гоце Делчев кој во Струмица го има најимпозантниот споменик, но и познатото струмичко корзо. Го претставуваат и големиот плоштад каде стои ѕвездата на менторот ,големиот Горан Пандев, но и споменикот Жена под маска, кој го илустрира познатиот Струмички карневал. Потоа ја пренесуваат магијата на големиот градски парк со многу зеленило, но и спортски терени, струмичките улици за што сите ја знаат легендарната песна „Во Струмица на улица“, како и многу други значајни културно историски споменици…
„Ние сме Брера Струмица“ – кампања за градот Струмица и нејзините убавини, за струмичани кои го сакаат фудбалот и спортот, за младите да бидат горди на своите фудбалери, кампања за заедништво и повисоки спортски резултати“, соопштија од клубот.
