![almak](https://strumicanet.com/wp-content/uploads/2025/07/1080x206-srnet-optimized.png")
Денеска започна да се гради новиот парк во населбата Карпош во Струмица, на површина од близу 40.000 метри квадратни и се наоѓа веднаш до Детската градинка „Виножито“ на просторот каде првично беше планиран Трговски центар.
„Ова е првата фаза од големиот нов градски парк за којшто средства обезбедуваме преку ИПА-ИНТЕРРЕГ програмата на Европската унија за што од мое лично име и од име на Општина Струмица и од граѓаните и граѓанките, сакам да се заблагодарам на ЕУ и европските даночни обврзници што веруваат во мојата и визијата на мојот тим и што инвестираат сериозни средства. Првата фаза е 350.000 евра, грант којшто нема да имаат обврска идните генерации да го враќаат, ние не земаме кредити, напротив, благодарение на стручниот тим од Секторот за ЛЕР и Одделението за меѓународна соработка и европски фондови, добивме грант од 350.000 евра за ова ругло да го претвориме во зелена оаза со сите содржини коишто можат да ни дадат право ова место да го наречеме парк“ – кажа градоначалникот Костадин Костадинов кој го посети местото каде започнаа градежните активности.
Како што најави тој, во првата фаза предвидени се пешачките патеки изработени од високо квалитетен травертин, мал амфитеатар со мултифункционална намена за децата од градинката, но и за сите млади и повозрасни кои своето секојдневие сакаат да го поминуваат токму тука. Ќе се продолжи кон втората фаза од големиот градски парк со добиени средства и копартнерски проект со УНДП.
„Станува збор за околу 15 милиони денари со кои ќе одиме не само на раззеленување, туку и кон дигитализација на самите паркови за што веќе разговараме со претставниците на УНДП и ќе имаме смарт клупи, ќе имаме осветлување на соларна енергија што значи нема да биде потрошувач на електрична енергија, ќе имаме и други содржини за дигитална едукација на најмалите и младите луѓе. Сметам дека народот тоа го заслужува, ние ветивме и еве денеска сме сведоци на отпочнување на новиот мега парк во Струмица, наместо новиот трговски центар во Струмица“, кажа Костадинов.
Костадинов најави и нови зелени површини, ветениот Боемски парк на постоечкиот пазар „Чешел“ и кај сегашното на диво изградено долно Турско маало по завршувањето на Социјалната населба каде што се градат 118 куќи, ќе има ново раззеленување на површина од околу 30.000 метри квадратни.
