Фондација Елеуса подготви 172 хуманитарните пакети – почнува дистрибуцијата

Фондација Елеуса од Струмица објави дека заврши подготовката на 172 хуманитарни пакети кои се наменети за најзагрозените семејства од Струмица, Василево, Ново Село, Босилово, Берово, Пехчево и Дојран. Оттаму велат дека за експедитивноста голема улога имаа волонтерите кои еден месец интензивно работеа на прибирање на храната, селекција и пакување.

„И возрасни и млади, сите заедно со една цел – подготовка на хуманитарните пакети за најзагрозените семејства од регионот. Еден месец, посветеност, пожртвуваност, ангажираност на педесеттина волонтери кои секој слободен момент го користеа да дојдат во собирниот пункт да помагаат. Мисијата е остварена, 172 пакети се подготвени да патуваат во домовите на оние семејства на кои им е потребна помош“, велат од Фондација Елеуса.

Првите пакети веќе се однесени кај семејства од Берово и Пехчево, а во наредниве денови ќе бидат испратени сите пакети до крајната дестинација.

Годинава за првпат беа вклучени и основните училишта од регионот. Учениците масовно, донираа храна за акцијата „Подари дел од својата трпеза, нахрани гладен“. Учествуваа и граѓаните кои оставаа артикли во корпите кои беа поставени низ маркетите во Струмица и Дојран. Во акцијата се вклучија и партнери, општествено одговорни компании кои донираа дел од својата палета производи. И Фондација Елеуса од сопствени средства дополнително набави производи за подготовка на пакетите.