Синоќа во Центарот за култура „Антон Панов“ се одржа трибина на тема „Зависност – криза на современиот човек“ во организација на Фондацијата „Елеуса“.
Говорници на трибината беа д-р Васка Митова – специјалист психијатар, советник логотерапевт и психотерапевт под супервизија, отец Симеон Кантурски- свештеник и дипломиран психолог, Билјана Мицева – социолог и социјален работник и Викарниот Епископ Стобиски г.Јаков.
На трибината сеопфатно беа изнесени факти и ставови со јасна порака, дека за зависниците има надеж и дека има голем број на светли приказни на луѓе кои излегле од мракот на зависноста.
Доктор Васка Митова вели дека клучно е да се разбере што подразбира зависноста и колку лица има таа. Честопати луѓето не се ни свесни дека стекнуваат зависност сѐ додека таа не почне да го менува нивниот живот и животот на нивните блиски.
Борбата со зависности е тешка и мачна, но, не е безнадежна. Ова е оценката на психотерапевтката Билјана Мицева, која повеќе од една деценија работи во Тераписката заедница „Покров“. Таа апелира за поддршка на лицата кои се борат со зависност за да се охрабрат да побараат помош.
Психологот и теолог отец Симеон Кантурски, вели дека зависноста е тешка состојба и дека личноста која се бори со зависност е во голем очај.
На трибината говореше и Викарниот епископ Стобиски г.Јаков, кој порача дека секој член на заедницата треба да развие свесност, но и прифаќање на лицата кои се борат со зависници. Како пример на трибината се посочи токму Тераписката заедница „Покров“, која е основана со поддршка на Струмичката Епархија.
Статистиките говорат дека бројот на зависници е во постојан пораст. Последните истражувања на европскиот мониторинг систем говорат дека во Македонија расте и бројот на адолесценти кои користат најразлични опијати. Од истражување на примерок од 2400 млади дури 20% користеле некаква дрога.
Инаку ова е трета трибина на Фондацијата „Елеуса“ од серијата „Современите искушенија како предизвици за духовно будење на личноста“.
