![almak](https://strumicanet.com/wp-content/uploads/2024/11/srnet-banner-noe-2-optimized.png")
Возниот парк на струмичката болница е побогат за уште едно амбулантно возило, донација од Фондацијата „ЗАЕВ – Едно општество за сите“. Директорот на Фондацијата, Зоран Заев и членот на Одборот на Фондацијата, д-р Венко Филипче во присуство на заменик министерката за здравство, д-р Маја Манолева и го предадоа амбулантното возило на директорката на ЈЗУ „Општа Болница“ Струмица, д-р Катерина Кузмановска.
Директорката на струмичката болница д-р Кузмановска заблагодарувајќи и се на Фондацијата „ЗАЕВ – Едно општество за сите“ кажа дека оваа амбулантно возило ќе биде од огромно значење за нив како здравствена установа имајќи го во предвид тоа дека Општата болница во Струмица покрива здравствени услуги за околу 120-130 илјади граѓани од југоисточниот регион, а на дневно ниво помеѓу 500 и 600 пациенти ги користат услугите во оваа болница.
„Често пати имаме потреба пациенти да транспортираме од нашата болница до Клиниката во Скопје. Затоа оваа донација ќе ни биде од голема корист. Имаме одлична соработка со Фондацијата „ЗАЕВ“, претходно и семејството Заеви донираа две амбулантно возила, имаме со нив направено реконструкции на одделенија во болницата. Се надевам дека оваа соработка со нив ќе продолжи и понатаму се во интерес на пациентите и граѓаните од југоисточниот регион“, кажа д-р Кузмановска.
„Ова е една донација којашто доаѓа како континуитет на еден процес на поддршка на Општата болница тука во Струмица. И не само во делот на донации туку и претходно, во време на мандатот на претходната Влада оваа болница беше многу поддржувана, како и сите други болници, се инвестираше многу во опрема, во кадар, за првпат во тој период Струмица доби магнетна резонанца, дигитален мамограф, дигитален рентген апарат и се обновуваше ангеографот којшто служи на целиот регион за пациентите кои имаат проблем со срцевите болести“, кажа д-р Филипче, член на Одборот на Фондацијата „ЗАЕВ – Едно општество за сите“, потенцирајќи дека освен оваа, трето амбулантно возило донација за болницата во Струмица, тие како Фондација работат и на поддршка на млади лекари, на нивна едукација кои во изминатиот период пет лекари се пратени на едукација, специјален курс во центарот за експериментална хирургија во Стразбур, и тој процес ќе продолжи и понатаму согласно реалните потреби на лекарите и на целокупниот медицински персонал од болницата во Струмица, додаде д-р Филипче.
За донацијата од Фондацијата „ЗАЕВ – Едно општество за сите“ се заблагодари и заменик министерката за здравство, д-р Маја Манолева која истакна дека оваа донација не е само чин на хуманост, туку претставува и поттик за сите нас којшто делуваме во оваа општетство, да се земе како еден позитивен пример и кој ќе биде поттик за други општествено одговорни организации, да го следат примерот.
Амбулантното возило денеска во дворот на болницата во Струмица го донесе Зоран Заев управувајќи го, а во придружба на поранешниот министер за здравство, д-р Венко Филипче.
