Фондацијата „Елеуса“ на 25 април ќе организира Хуманитарен концерт – „Звукот на човечноста“

Од Фондацијата „Елеуса“ денеска на прес конференција го најавија првиот Хуманитарен концерт „Звукот на човечноста“, што ќе се одржи на 25 април во Центарот за култура „Антон Панов“ во Струмица.

„Освен, што ова е прв настан од ваков вид, кој го впишуваме во хуманитарното портфолио на нашата организација, ова е ревијален настан за нашата заедница. За првпат на една сцена ќе настапат бендовите на трите средни училишта од Струмица „Јане Сандански“, „Димитар Влахов“ и „Никола Карев“, основното музичко училиште „Боро Џони“ и Вокално-инструменталната група „Стихири“. Тоа е силата на заедништвото, на соработката и на солидарноста, атрибути кои ги негуваме и поттикнуваме“, кажа Катерина Панов Кожаров.

Концертот е од хуманитарен карактер, а средствата собрани од продажбата на билетите ќе бидат наменети за Фондацијата „Елеуса“.

Билетите по цена од 300 денари се пуштени во продажба на билетарницата во НУЦК „Антон Панов“.

„Очекуваме дека, онака како што ентузијастички се вклучија училиштата во оваа хумана мисија, така и публиката со задоволство ќе одговори за сите заедно да учествуваме во помагањето на над 1000 семејства кои добиваат директна поддршка од нашата Фондација“, додаде Катерина Панов Кожаров.