„Уште на почетокот на мандатот ќе се залагам капитациониот бод за матичните лекари да се зголеми за 15%“. Оваа порака ја испрати д-р Венко Филипче од вчерашната трибина одржана во Прилеп посветена на Светскиот ден на здравјето. Неврохирургот Филипче е носител на листата на СДСМ во Изборната Единица 4.
„Ние тоа еднаш го направивме и затоа и понатаму продолжуваме да го зајакнуваме примарното здравство. Примарната здравствена заштита е клучна за здрави поколенија, а матичните лекари заслужуваат нивната работа да биде признаена и вреднувана. Затоа, ќе ја зголемиме капитацијата, не во текот на мандатот, туку уште на самиот почетокот“, рече Филипче.
Пред поголем број на здравствени работици присутни на трибината, д-р Филипче презентираше и други мерки, со фокус на примањата на здравствените работници и задржување на медицинскиот персонал во земјава преку подобрување на образованието, инфраструктурата и условите за работа во здравствените установи.
„Лекарите специјалисти ќе бидат платени до 180.000 денари. Во општите болници лекарите ќе примаат плата до 140.000 денари. Матичните лекари до 120.000 денари. Медицинските сестри, меѓу 60 и 90.000 денари“, рече Филипче.
Покрај инвестирањето во здравствениот персонал, како што истакна Филипче, планирани се и инвестиции во здравствена инфраструктура и во медицинска опрема што дополнително ќе влијае позитивно на брзата дијагностика по современи стандарди и спасување на повеќе животи.
