![almak](https://strumicanet.com/wp-content/uploads/2025/08/srnet-banner-аugust2025-optimized.jpg")
Има само 15 години, долго време пишува поезија, создава стихови, со нив учествува на разни литературни манифестации каде освојува награди, а како полуматурант веќе го има своето првенче, книга – стихозбирка со творби насловена „Филигран од мастило“. Младиот струмичанец Лука Костов синоќа пред бројна публика во Центарот за култура „Антон Панов“ во Струмица ја промовираше токму оваа книга со стихови.
„Неговото филигранство се везе од нишки што се извлекуваат од срцето, од длабочината на погледот, до најтајните одаи на уметничката му душа, се протега конецот што се разлачува преку креативното предиво. Читајќи ги неговите младешки стихови, многу е лесно човек да се потсети на убавината на љубовниот копнеж или на гордоста да се припаѓа во општеството што упорно како возрасен те тера да се откажеш од него, ама како дете, како младич си го воспевал, си го моделирал по сопствено убедување, си го величел“ – кажа рецензентот на книгата, м-р Владе Ефтимов потенцирајќи дека Лука е верен чувар на македонскиот бит, па низ неговите редови и стиховни низи ќе се најдат фолклорни и митски слики директно поттикнати и инспирирани од македонската народна традиција – симболика и поетски слики кои ретко се среќаваат кај помладите креативни дејци.
„Во неговите душевни одаи тлее љубовта кон Македонија, кон социумот во којшто расте и се развива, кон културното и литературно наследство што како Македонец го наследува, дозачинети со религиозната поткованост, посветеност и љубов, квалитети што некако природно ги наследува младиот поет, ако се земе предвид социо-културниот контекст во којшто се развива самиот“ – додаде Ефтимов.
Говорејќи за оваа првенче на Лука Костов, создадено од 40-тина поетски творби, промоторката Даниела Пејева Митева кажа дека со „Филигран од мастило“ младиот поет не само што се претставува пред книжевната јавност, туку и нуди прозорец во еден свет каде младоста не значи повеќе, ниту порив, туку светен, бунтовен, духовен, а сепак негов.
„Поетското првенче на Лука Костов ми наликува на типична младешка поезија. Тој е крик, копнеж, молитва и визија. Сето тоа ткаено во зборови што не се излеваат од мастилница. Во време кога зборот лесно се троши, а мислата често бега, Лука Костов се појавува како глас кој не се плаши да праша, да се сврти кон себеси, да ѕирне во корените и да пее за љубовта, тагата, идентитетот и духовноста“ – кажа Пејева Митева.
Модератор на промоцијата беше Величе Илиева, делови од поезијата читаше Викторија Илиева со музичка илустрација од гитарата на Филип Костов.
