Фестивалот „Ристо Шишков“ номиниран за наградата „Најдобар фестивал/манифестација за 2022“ на првиот БЕАМ

Фестивалот на камерен театар „Ристо Шишков“, кој се одржува секоја година во месец септември во Струмица е номиниран за наградата „Најдобар фестивал/манифестација за 2022“ на првиот БЕАМ.

Жири комисијата го заврши првиот круг на гласање во четири категории и во трка за наградата во категоријата Најдобар фестивал/манифестација го номинира и Фестивалот „Ристо Шишков“. Во конкуренција ќе биде заедно со неколку фестивали и манифестации кои се одржаа изминатата 2022 година, меѓу кои се и Фестивалот „Охридско лето“, „Мајски оперски вечери“, „Пиволенд“, „Таксират Фестивал“, „Мажи на годината“…

БЕАМ е манифестација за избор и доделување награди за најдобрите настани што се одржуваат во Македонија. БЕАМ е единствената можност за професионалците директно да се натпреваруваат за да се утврди кои се најдобрите настани во Македонија.

Наградите ќе се доделуваат во различни категории и се отворени за сите настани, менаџери на настани, агенции и даватели на услуги за поддршка без оглед на типот на настан или публика, големината на настанот, присуството или локација на настанот.

Фестивалот на камерен театар „Ристо Шишков“ претходната година го одбележа јубилејот – 30 години од основањето, а Општина Струмица на 11 декември го одликува со Годишната награда – Столен медал на Св. Петнаесет Тивериополски свештеномаченици од редот на светиот македонски крст за особен придонес во областа на културата.