Непресушниот извор, долгогодишниот собирач на богатствата од македонското народно творештво, 85-годишниот Иван Котев на публиката и подарува уште едно дело од неговото собирано богатство во изминатите 55 години, како обичај, традиција, говор, приказна, песна, или како што вели професорката Ана Витанова Рингачева, „народниот живот на својот народ“.
Книгата е насловена „Судбина с’с ваглен напишана“. Станува збор за зборник со македонски поговорки, пословици, изрази и фрази од Струмица и Струмичко. Ова е всушност втор том којшто се надоврзува на огромното лексичко и фразеолошко богатство собрано во книгата „Мудроста на вековите“ од 2012 година на Иван Котев. Книгата со безмалку 500 страници е богата со речиси 14.000 фолклористички единици: пословици, поговорки, изрази и фрази од Струмица и Струмичко.
„Посака Иван Котев во своето бело видело да го собере и запише народниот живот на својот народ, да собере сѐ во една вреќа, па макар од неа зборовите паѓале поради преполнетост. Знае тој дека духовната храна е исто толку насушна колку и лебот, и дека без неа не ќе сме ги преживеале вековните премрежиња. Животот со сета своја драматичност извира од зборовите и фразите, налик на ехо од минатите и од дамнина заборавени времиња. Но има нешто толку спокојно и помирувачки во подвигот на Котев: помислата дека за еден краток човечки век успеал на едно место да ги запише сите човечки маки, јанѕи, радости, надежи, тивки прегрешенија и молитви. Судбината го предоредила Иван со торбата на рамо, и ноќе и дење да оди по нивјето и дворјето и да ги собира плодните зрна коишто зад себе ги оставиле нашите предци. Но, рекол народот: „Госпот према планианта го дава и снего.“ Мудроста нема свое постојано време и место, таа постојано се умножува, расте, се преобразува и како жива вода тече низ дамарите на времето“ – напиша рецензентот на книгата проф. д-р. Ана Витанова Рингачева, книжевна критичарка, есеистка и универзитетски професор, која повеќе години соработува со Котев и го проучува фолклорниот материјал собиран од него.
Оваа најново издание на Иван Котев е поддржано од Министерството за култура и туризам. Уредник е новинарката и поетеса м-р Сузана Мицева, лектурата е на Јасмина Поркојевиќ – Миленковиќ. Корицата ја направи Коста Бозов, а техничката поддршка на уредувањето и печатењето на книгата е на Влатко Филчевски и Иван Бозов.
