Учениците од ПОУ „Св. Климент Охридски“ во Ново Село добија донација – пакети со училишен прибор

Фондацијата „ЗАЕВ – Едно општество за сите“ реализираше уште едно донаторство од хуманитарен карактер. Деновиве сите ученици од Посебното основно училиште „Св. Климент Охридски“ во Ново Село добија пакети со училишен прибор, неопходен за непречено одвивање на секојдневните училишни активности.

Ева, Душко и Славица Заеви од Фондацијата „ЗАЕВ – Едно општество за сите“ ги посетија учениците, се дружеа со нив и на сите 38 ученици им го подарија училишниот прибор.

„Нашите претставници беа срдечно пречекани од страна на учениците, а средбата со нив, во извонредно топла и пријатна атмосфера, помина во прекрасно дружење. За крај, Ева, Душко и Славица добија благодарници од директорката на училиштето, но останува најголемиот дар – незаборавното другарување со учениците. При разделбата со нив, претставниците на Фондацијата „ЗАЕВ – Едно општество за сите“ уште еднаш им посакаа успех во учебната 2023/2024 година, како и јакнење на нивното меѓусебно другарство. Се надеваме дека и во нашата фондација препознаа уште еден нов пријател“, велат од Фондацијата.